Kɛ' 'ɛ 'sbɛ
Kɛ' -blaa 'de 'sraa -saa' ke 'sraadɩ 'a ‑tɩ' 'ʋn ɛ
1
Nyɔsoa 'da Moisɩ 'mɛ 'de -tan 'tan -ɛ -sɔn ɔ ke Kea 'a ‑gbʋʋan "i, -wɛe ɛ 'na: 2 -Ɩn -wlu 'de Israɛ -kɔʋn -pee -ɩn ‑na: -bo aoa' jrɔ' 'je "nɔdɛ- jrɛ' 'sraa 'ʋn -saa ɔ 'jeɛ Nyɔsoa Kea "nyɩ ɛ, -mɛ ɔ -sɛ 'de ɔɔ' "nɔdɛ- klae" ke mɩɩ" "kwlu.'Sraa -ɛ -wee' nɛ dia
3 -Bo ɛ nɩ "nɔdɛ- klaa" mɛ ɔ 'je 'sraa -ɛ -wee' nɛ dia 'ʋn -saa a, -mɛ ɔ ja ɛɛ' 'beɔ ‑kɔ sea -pʋn" nɩɛ, -wɛe ɛ 'je 'sraa 'ʋn -saa 'de -tan 'tan -ɛɛ 'di Nyɔsoa ke ʋʋa ‑gbʋʋn' a "juɛi, -bo ɛ nɩ 'kan -wɛe ɛ 'je Nyɔsoa "jri 'de inmɔɔ‑. 4 Nyɔ -ɔɔ ja 'sraadɛ, ɔ -teɛ' kwa 'de "nɔdɛ -nɩa 'mʋʋa‑ "jru, ‑wɛe nyʋ 'jeɛ juo ka ɛmɛ -jii 'de ɔɔ' dɩsaɩn 'a ‑kɔ "i ɛ. 5 Ɔɔ muɛ bli' beɔ ‑tɔo ‑nɛ ‑pliɔn' cɛan' 'de Nyɔsoa "juɛi, ‑wɛe Aarɔn 'ɔ "nynuu‑, 'sraa ‑saʋn, 'je ɛɛ' nmɔ to-. ‑Wɛe ʋʋ 'je "kpa ‑ɛɛ "kpei ʋʋ ‑saa 'sraa, ‑ɛ ‑nɩa 'e -tan 'tan -ɛ -sɔn ʋʋ ke Kea 'a ‑gbʋʋan "i "juɛi 'a 'fɔ ‑wee' blaa‑. 6 'Sʋ ‑bo nyɔ -ɔ -ja "nɔdɛ- ‑sɛ ɛɛ' ku 'e ɛ ‑wɛe ɔɔ ceɛn i. 7 'Sʋ 'sraa -sai Aarɔn 'ɔ "nynuu ‑tba' nɛ 'de "kpa "kpei, ‑wɛe ʋʋ po nae -tuu". 8 ‑Wɛe nmi 'a kpɔ ‑nɩ o, ɛɛ' "jru ke ɛɛ' 'fɔ ‑blea 'cna, ʋʋ ‑tɩ' 'de nae ‑nɩa waan' 'de "kpa ‑nɩa 'mʋʋa‑ "kpei. 9 'Sʋ ɔɔ wɔɔ ɛɛ' 'mɩ ke, ɛɛ' bɩ 'mɛ 'de "ni o, ‑wɛe 'sraa ‑sai pʋɩ ‑wee' "jri 'de "kpa "kpei. Ɛ nɩɛ 'sraadɛ ‑ɛ ‑wee' "klein nɛ di a, ‑wɛe ‑ɛɛ 'nʋ a jaa Kea 'a pɛe ja ‑o.
10 ‑Bo ɛ nɩ "nɔdɩ mɩɩ" ɔ 'je 'sraa -ɛ -wee' nɛ dia 'ʋn ‑saa, ‑bo ɛ nɩ 'blae ‑gblɔ o, ‑bo ɛ nɩ ‑faan" ‑tɔo o, -mɛ ɛɛ' -jɛ ‑kɔ sea ‑pʋn" nɩ mɛ ɔ 'je ja-. 11 Nyɔ ɔ muɛ ‑pliɔn' cɛan' 'de Nyɔsoa "juɛi, 'de "kpa 'a 'fɔ ‑ɛ -bɔɔa 'de 'kwea fɔo ɛ, ‑wɛe Aarɔn ɔ' "nynuu‑ ‑ʋʋ ‑nɩa 'sraa ‑saʋn 'je ɛɛ' nmɔ "kpa 'a 'fɔ ‑wee' "klein blaa‑. 12 'Sʋ ɔɔ cɛn ɔɔ' nmi ‑nɩa 'mʋʋa‑ kpɔ, ‑wɛe 'sraa ‑saʋn 'je ɛɛ' kpɔ o, ɛɛ' "jru ke ɛɛ' 'fɔ ‑blea 'cna, ʋʋ 'je ɛ nɛ "kpei ‑te' 'de "kpa "kpei. 13 Ɔɔ muɛ ɛɛ' 'mɩ ke ɛɛ' bɩ wɔɔa' 'de "ni o, ‑wɛe 'sraa ‑sai 'jɩ Kea "i to ‑wɛe ɔ 'jɩ "jri po 'de "kpa "kpei. Ɛ nɩɛ 'sraadɛ ‑ɛ ‑wee' "klein nɛ dia, ‑wɛe ‑ɛɛ 'nʋ a jaa Nyɔsoa 'a pɛe ja ‑o.
14 ‑Bo ɛ nɩ nʋʋɛ, mɛ nyɔ jrɔ' nɩ "i ɔ 'je 'sraa ‑ɛ ‑wee' nɛ ɛ dia 'ʋn ‑saa ɔ 'je Kea "nyɩ ɛ, ‑bo ɛ nɩ "pau o, -bo ɛ nɩ -gbɔlɛ' o, -mɛ ɛɛ' jrɛ' mɛ ɔ 'je ja-. 15 'Sraa ‑sai a muɛ 'je "kpa "juɛi jaa', ɔ je ɛɛ' -plʋn 'ʋn fie-, ɔ 'je ɛɛ' "jru 'e cɛn ɔ 'jeɛ "jri po 'de "kpa "kpei, ‑wɛe ɔ 'je ɛɛ' nmɔ "kpa 'a ‑gblʋn kwii plee‑. 16 Ɔɔ ‑sa ɛɛ' ‑fɔ ke dɩ -nɩa 'de ɛ di 'e 'mɛ, ‑wɛe ɔɔ ‑fii" i 'de "kpa 'a 'fɔ ‑nɩa 'e 'jrʋ 'a 'wlʋɩn o, ‑ta nyɔ ɔ poa 'sraa dɛ 'ɛ biʋn' ɛ. 17 Ɔɔ wɛɛ wɔn 'kaa ɔɔ' ‑seeɛ "i. ‑Wɛe ɔɔ poɛ "jri 'de "kpa "kpei, ɛ nɩɛ 'sraa ‑ɛ ‑wee' "klein nɛ di a, ‑ɛɛ 'nʋ a jaa Nyɔsoa 'a pɛe ja ‑o.